असोज १२, काठमाडौं: गृहमन्त्री रमेश लेखकले निरन्तरको वर्षाका कारण उत्पन्न बाढी, पहिरो लगायतका प्राकृतिक विपद्को जोखिममा परेका नागरिकहरूको उद्दार, राहत, र घाइतेहरूको स्वास्थ्य उपचारमा सरकार गम्भीर भएर लागेको बताएका छन्। सिंहदरबारस्थित गृहमन्त्रालयमा बसेको ‘मनसुन पूर्वतयारी तथा प्रतिकार्य कमाण्ड पोष्ट’को बैठकपछि सञ्चारकर्मीहरूसँग कुरा गर्दै गृहमन्त्रीले काठमाडौं उपत्यकामा मात्रै नेपाली सेना, नेपाल प्रहरी, र सशस्त्र प्रहरी बलको उद्दार टोलीले ७५० भन्दा बढी नागरिकको सकुशल उद्दार गरेको जानकारी दिए।
उक्त बैठकमा मुलुकभर बाढी, पहिरो, र डुबानबाट भएको जनधनको क्षतिको सूचना संकलन गर्ने, उद्दार तथा राहतलाई थप प्रभावकारी बनाउने विषयमा छलफल भएको बताए। गृहमन्त्री लेखकले बाढी, पहिरो लगायतका विपद्बाट हुने क्षति न्यूनीकरणका लागि सबै सुरक्षा संयन्त्र परिचालित भएको उल्लेख गरे।
उद्दार तथा राहत कार्यहरूमा सरकारले सक्रियता देखाएको, काठमाडौंका अवरुद्ध सडकहरू खुलाउन पहल भइरहेको, र विपद् व्यवस्थापनको लागि सुरक्षा निकाय तथा अन्य सम्बन्धित निकायहरूलाई २४ घण्टा सक्रिय बनाइएको जानकारी उनले दिएका छन्।
