असोज १२, काठमाडौं : काठमाडौं उपत्यकामा लगातारको वर्षाका कारण आएको बाढी, पहिरो, र डुबानले अहिलेसम्म २३ जनाको ज्यान गएको पुष्टि भएको छ। काठमाडौं उपत्यका प्रहरी कार्यालयले दिएको विवरण अनुसार काठमाडौं, ललितपुर, र भक्तपुर जिल्लामा बाढी, पहिरो, र घर भत्कनाका कारण जनधनको क्षति भएको छ।

काठमाडौंमा ९, ललितपुरमा ९, र भक्तपुरमा ५ जनाको मृत्यु भएको छ भने विभिन्न अस्पतालमा ११ जना घाइतेको उपचार भइरहेको छ। अझै केही मानिस बेपत्ता रहेको र खोजी कार्य जारी रहेको जानकारी छ।

यसका साथै, बाढीबाट प्रभावित ९१८ जनालाई सुरक्षित स्थानमा उद्धार गरिएको छ। नेपाल प्रहरीको ठूलो संख्यामा परिचालन गरी उद्धार कार्यलाई तीव्र बनाइएको छ।