असोज १३, सुनसरी : सुनसरी सप्तकोशी नदीमा पानीको बहाव ५६ वर्षयताकै उच्चस्तरमा पुगेको छ। आज बिहान ३ बजे गरिएको मापनअनुसार कोशी ब्यारेज भएर सप्तकोशीको पानीको बहाव प्रतिसेकेन्ड ६ लाख ४३ हजार ५४० क्युसेक पुगेको छ। कोशी ब्यारेज कन्ट्रोल रुमले यो जानकारी दिएको हो।
यसअघि सन् १९६८ अक्टोबर ५ मा कोशीमा अहिलेसम्मकै उच्च बहाव प्रतिसेकेन्ड ७ लाख ८८ हजार २०० क्युसेक मापन गरिएको थियो। शनिबार राति १०:२५ बजे सप्तकोशीको पानीको बहाव प्रतिसेकेन्ड ६ लाख २० हजार क्युसेक मापन गरिएको थियो।
कोशी ब्यारेज कन्ट्रोल रुमले राति ११ बजे दिएको जानकारीअनुसार जलसतह खतरा तहभन्दा ११.२६ मिटर माथि पुगेको र अझै बढ्ने क्रममा रहेकाले सतर्कता अपनाउन अनुरोध गरिएको छ। पानीको बहाव बढ्दै गएपछि कोशी ब्यारेजका सबै ५६ ढोका खोलिएको छ।
सप्तकोशी नदीको जलसतह खतरा तहभन्दा माथि पुगेको र अझै बढ्ने क्रममा रहेकाले उदयपुर, सुनसरी, र सप्तरीका कटान र डुबानको जोखिममा रहेका होचा भूभागका बासिन्दालाई सुरक्षित स्थानतर्फ सर्न सप्तकोशी चतरा जलमापन केन्द्रले सूचना जारी गरेको छ। नदीमा पानीको बहाव बढ्दै गएपछि कोशी ब्यारेजमा मानिस र सवारीसाधनको आवागमन अर्को सूचना जारी नभएसम्मका लागि बन्द गरिएको सुनसरीका प्रमुख जिल्ला अधिकारी रामचन्द्र तिवारीले जानकारी दिएका छन्।
शनिबार बिहान ६ बजे मापन गरिएको बहाव प्रतिसेकेन्ड ३ लाख ३६ हजार १० क्युसेक थियो। साँझ ८ बजे प्रतिसेकेन्ड ४ लाख १८ हजार २८५ क्युसेक, राति १२ बजे प्रतिसेकेन्ड ५ लाख ७ हजार ६९० क्युसेक र आज बिहान २ बजे प्रतिसेकेन्ड ६ लाख ३२ हजार २८५ क्युसेक मापन गरिएको थियो।
