देशभर बाढी, पहिरो र डुबानका कारण हालसम्म १७० जनाको मृत्यु भएको छ भने ४२ जना बेपत्ता छन्। गृह मन्त्रालयका प्रवक्ता ऋषिराम तिवारीका अनुसार, यी घटनाहरूमा १११ जना घाइते भएका छन्। उद्धार प्रयासहरूमा सबै सुरक्षा निकायहरू सक्रिय रहेका छन्, र हालसम्म करिब ४,००० विपद् प्रभावितको उद्धार गरिएको छ।
काभ्रेपलाञ्चोक, सिन्धुली, र ललितपुरलगायतका जिल्लाहरूबाट नेपाली सेनाको हेलिकप्टरको सहयोगमा १६२ जनालाई उद्धार गरिएको छ। प्रभावितलाई खाद्यान्न र अन्य आपतकालीन राहत सामग्री उपलब्ध गराइएको छ, र घाइतेहरूको निःशुल्क उपचार भइरहेको छ।
गृह मन्त्रालयले खोज, उद्धार, र राहत कार्यलाई उच्च प्राथमिकता दिएको छ। साथै, अवरुद्ध राजमार्गहरू पुनः सञ्चालनमा ल्याउन पहल गरिरहेको छ। प्रदेश सरकार, जिल्ला विपद् व्यवस्थापन समिति, र स्थानीय विपद् व्यवस्थापन समितिहरू पनि सक्रियतापूर्वक उद्धार र राहत कार्यमा जुटिरहेका छन्।
