असोज २४, काठमाडौं – पुण्य गौतममाथि रड प्रहार गरेको आरोपमा प्रहरीले दुई जनालाई पक्राउ गरेको छ। जिल्ला प्रहरी परिसर काठमाडौंका एसपी नवराज अधिकारीका अनुसार, ४६ वर्षीय पुण्य गौतममाथि गोकर्णेश्वर नगरपालिका-८ बेशीगाउँस्थित सडकमा रडले प्रहार गरिएको थियो। घटनामा संलग्न भनिएका दुई जनालाई प्रहरीले पक्राउ गरेको छ।
पक्राउ पर्नेहरूमा काभ्रे तेमालका ३० वर्षीय संजिव तामाङ (टासी लामा) र रसुवा निवासी ४१ वर्षीय दिलबहादुर गङदाङ (मिलन) रहेका छन्। संजिवलाई मंगलबार र दिलबहादुरलाई बुधबार पक्राउ गरिएको हो।
प्रहरीले उनीहरूबाट एक रड र तीन मोबाइल पनि बरामद गरेको छ। एसपी अधिकारीका अनुसार, उनीहरूमाथि ज्यान मार्ने उद्योग अन्तर्गत अनुसन्धान अघि बढाइएको छ।
पक्राउ परेका दिलबहादुर गङदाङलाई मुख्य योजनाकारको रूपमा पहिचान गरिएको छ। उनी नागरिक बचाउ महाअभियान अन्तर्गत नागरिक प्रतिरक्षा बलका संयोजक हुन्। घटनाको कारण भने अझै खुल्न सकेको छैन।
