गुल्मीमा पेट्रोल भरिसकेपछि मोटरसाइकलमा आगलागी
कात्तिक ७, गुल्मी : गुल्मीमा पेट्रोल भरेर स्टार्ट गर्ने क्रममा अचानक मोटरसाइकलमा आगलागी भएको छ, जसले गर्दा मोटरसाइकल पूर्ण रूपमा नष्ट भएको छ।
आगलागी भएको मोटरसाइकल गुल्मी गुल्मीदरबार-४ का ३० वर्षीय कृष्ण बुचाको हो। जिल्ला प्रहरी कार्यालय गुल्मीका प्रहरी नायव उपरीक्षक शंकर पोखरेलका अनुसार, बुचाले तम्घास बसपार्कस्थित शिव शक्ति आयल स्टोर्समा पेट्रोल भरेपछि स्टार्ट गर्न खोज्दा लु८प १०५३ नम्बरको मोटरसाइकलमा आगलागी भएको हो।
आगलागीका कारण मोटरसाइकल पूर्ण रूपमा जलेर नष्ट भए पनि कुनै मानवीय क्षति भने नभएको पोखरेलले जनाएका छन्। नेपाल प्रहरी र रेसुङ्गा नगरपालिकाका नगर प्रहरीको सहयोगमा आगो नियन्त्रणमा ल्याइएको थियो।
मोटरसाइकल जलेर नष्ट भए पनि पेट्रोल पम्प र वरपरको क्षेत्र ठूलो क्षति हुनबाट जोगिएको प्रहरीले जनाएको छ।
