आउँदा दशक नेपाली जनताका विजयका दशक हुने विप्लव सीको विश्वास
काठमाडौं । नेपाल कम्युनिष्ट पार्टीका महासचिव विप्लव सीले आउँदा दशक नेपाली जनताका लागि विजयका दशक हुने दाबी गरेका छन्। १३२औं माओ दिवसको अवसरमा बिहीबार बिहान जारी वक्तव्यमा उनले यो धारणा राखेका हुन्।
महासचिव सीले वक्तव्यमा उल्लेख गरेका छन्, “नेपालमा मालेमावादको प्रकाशमा सामन्तवादलाई समाप्त गरिए पनि दलाल पुँजीवाद अझै छडा साँढेझैं मत्ताइरहेको छ। साम्राज्यवादी शक्तिहरू, विशेषगरी अमेरिकी भूमण्डलीकृत साम्राज्यवाद, आफ्नो प्रभुत्व कायम गर्न सक्रिय छन्। नेपाली श्रमिक जनता अब दलाल पुँजीवादी सत्ता चिहानमा पुर्ने र नेपाली विशेषताको समाजवाद स्थापना गर्ने एकीकृत जनक्रान्तिमा अघि बढिरहेका छन्।”
माओ दिवसको महत्व
विप्लव सीले महान नेता माओ त्सेतुङको योगदानलाई स्मरण गर्दै भने, “माओले माक्र्सवाद–लेनिनवादलाई चिनियाँ विशेषतासँग समायोजन गर्दै २७ वर्ष लामो क्रान्तिद्वारा चिनियाँ सामन्तवाद, दलाल पुँजीवाद, र जापानी साम्राज्यवादलाई पराजित गरे। उनले अध्यारो चीनलाई उज्यालो चीनमा रूपान्तरण गरिदिए। चिनियाँ क्रान्तिको ऊर्जा विश्वभरका श्रमिक जनताका लागि प्रेरणादायी बन्यो।”
नेपालको परिप्रेक्ष्यमा, विप्लव सीले मालेमावादको प्रभावमा सामन्तवादको अन्त्य भए पनि नेपाली समाजलाई अझै धेरै चुनौतीहरूको सामना गर्नुपर्ने स्थिति रहेको बताए। उनका अनुसार, “दलाल पुँजीवाद र साम्राज्यवादविरुद्ध संघर्ष जारी छ, जसका लागि नेपाली जनताले एकीकृत जनक्रान्तिको बाटो रोजेका छन्।”
एकीकृत जनक्रान्तिको मार्ग
महासचिवले उल्लेख गरेअनुसार, “नेपाली विशेषताको समाजवादको लक्ष्य हासिल गर्न नेपाल कम्युनिष्ट पार्टीले चिनियाँ क्रान्तिबाट प्रेरणा लिँदै आफ्नै मौलिकता सहितको क्रान्तिको मार्ग निर्माण गरेको छ। यो मार्ग अवश्य सफल हुनेछ।”
माओको भनाइ उद्धृत गर्दै उनले भने, “हामीले जनतालाई विजयका इतिहास र भविष्यका सम्भावनाबारे निरन्तर जानकारी दिनुपर्छ। यसैगरी, जनतालाई संघर्षका बाङ्गाटिङ्गा मोडहरूको तयारी पनि गराउनुपर्छ। जनताको सत्ता स्थापना गर्ने हाम्रो उद्देश्य पूरा गर्न बाँकी छ। केही व्यक्तिहरूले आफ्ना स्वार्थका लागि जनताको नाममा सत्ता चलाउन खोजे पनि जनता यस्तो प्रचारप्रति विश्वस्त छैनन्।”
विजयका दशकको विश्वास
विप्लव सीले नेपाली जनताले सामन्तवादको अन्त्य गर्दै नयाँ सम्भावनाहरूको ढोका खोल्ने विश्वास व्यक्त गरे। उनका अनुसार, “जनतालाई सफलताको इतिहास र भविष्यको विश्वास दिलाउन सके, एकीकृत जनक्रान्तिले विजय सुनिश्चित गर्नेछ। आउँदा दशक जनताको विजयका दशक हुनेछन्।”
यस अवसरमा महासचिवले विश्वभरका श्रमिक वर्गलाई वैज्ञानिक समाजवाद र साम्यवादको मार्गमा अघि बढ्न शुभकामना पनि व्यक्त गरे।
