पुस २८, कैलाली : थारू समुदायको मुख्य पर्व माघी नजिकिँदै गर्दा कैलाली, कञ्चनपुरलगायत तराईका थारू बस्तीहरू चहलपहलले भरिएका छन्। नयाँ वर्षको आरम्भको रूपमा उल्लासपूर्वक मनाइने यो पर्वका लागि समुदायका सदस्यहरू तयारीमा जुटेका छन्।



घरपरिवारका सबै सदस्यले आ–आफ्नो भूमिका निर्वाह गरिरहेका छन्। पुरुषहरू मासु जोहो गर्न व्यस्त छन् भने महिलाहरू दुना, टपरी बनाउने, अण्डी चामलको पिठो तयार पार्ने, दाउरा सङ्कलन, घर लिपपोतजस्ता काममा खटिएका छन्।
थारू नागरिक समाजका संयोजक दिलबहादुर चौधरीका अनुसार माघीमा बङ्गुरको मासु, माछा, घोंगी, गङ्गटालजस्ता परिकारको व्यवस्था गर्न समुदाय व्यस्त देखिन्छ। त्यस्तै, पर्वको अवसरमा नयाँ लुगा किन्ने र रोजगारीका लागि विदेश गएका सदस्य घर फर्कने क्रम पनि बढेको छ।
पर्वका विशेष परम्परा र तयारी
थारू समुदायका माधव चौधरीका अनुसार गाउँमा भलमन्साको बैठक बसेर बङ्गुरको व्यवस्थापनसम्बन्धी योजना बनाइएको छ। अण्डी चामलको रोटी र ढिक्रीजस्ता परिकारको तयारी माघीभन्दा एक महिना अघिदेखि नै सुरु भइसकेको छ। साथै, माघौटा नाचको अभ्यास पनि तीव्र भइरहेको छ।
माघीको दिन बिहानै नदी वा तलाउमा गई नुहाइधुवाइ गर्ने र ठूलो व्यक्तिबाट आशीर्वाद लिने परम्परा रहेको छ। घरमा छुट्याइएको चामल, नुन, तेल, बेसारजस्ता सामग्री प्रयोग गरी छोरीबेटीलाई परिकार दिने प्रचलन पनि छ।
लोकसंस्कृति झल्कने मेला र महोत्सव
माघी पर्वका अवसरमा थारू समुदायका विभिन्न लोकनृत्य र गीतसंगीत प्रस्तुत गरिन्छ। साथै, गाउँगाउँमा मेला तथा महोत्सव आयोजना गरी पर्वको रौनक थपिन्छ।
माघी थारू संस्कृतिको पहिचान र एकताको प्रतीक पर्व हो, जसले समुदायको मौलिकता र सामूहिकता झल्काउँछ।