कर्णाली प्रदेश अस्पताललाई स्वास्थ्य प्राज्ञिक केन्द्रको रूपमा विकास गर्न उच्चस्तरीय समितिले सरकारलाई सुझाव दिएको छ। तर, यसबाट प्रदेश सरकारलाई आर्थिक भार नपर्ने गरी अघि बढ्नुपर्ने समितिको निष्कर्ष छ।
प्रा.डा. भगवान कोइराला नेतृत्वको समितिले अस्पताललाई स्तरोन्नति गर्न पाँच विकल्पसहितको प्रतिवेदन मुख्यमन्त्री यामलाल कँडेललाई बुझाएको हो। प्रतिवेदनमा स्वास्थ्य विज्ञान प्रतिष्ठान स्थापना, आङ्गिक शिक्षण संस्थाको रूपमा विकास, सुर्खेत मेडिकल कलेजसँग सहकार्य, कर्णाली स्वास्थ्य विज्ञान प्रतिष्ठानसँग सहकार्य, र मध्यपश्चिम विश्वविद्यालयसँग समझदारी गरेर अघि बढ्न सकिने विकल्पहरू प्रस्तुत गरिएको छ।
समितिले प्रदेश अस्पताललाई स्वास्थ्य प्राज्ञिक केन्द्र बनाउँदा हाल सञ्चालन हुन नसकेका विशिष्टीकृत सेवाहरू प्रदान गर्न सकिने र प्रदेशको समग्र स्वास्थ्य प्रणालीलाई राष्ट्रियस्तरमा उकास्न सहयोग पुग्ने बताएको छ। तर, यसो गर्दा आर्थिक भार नपर्ने गरी प्रदेश र संघ सरकारको समन्वयमा उदाहरणीय परियोजना सञ्चालन गर्न सकिने विकल्प पनि दिइएको छ।
प्रतिवेदनमा प्रस्तावित विकल्पहरूमा आ-आफ्नै सबल र दुर्बल पक्षहरू रहेको बताइएको छ। जस्तै, स्वास्थ्य विज्ञान प्रतिष्ठान स्थापना गर्दा स्वायत्त संस्था बन्ने भए पनि आर्थिक भार थपिने र दक्ष जनशक्ति व्यवस्थापनमा जटिलता आउन सक्ने बताइएको छ। त्यस्तै, अन्य विकल्पहरूमा पनि कानुनी झमेला, स्रोत व्यवस्थापनमा समस्या र प्रशासनिक जटिलता जस्ता चुनौतीहरू औँल्याइएका छन्।
मुख्यमन्त्री कँडेलले समितिको सुझावलाई आधार मानेर अघि बढ्ने बताएका छन्।
