काठमाडौं, राजस्व अनुसन्धान विभागले २५ करोडभन्दा बढी बराबरको विदेशी मुद्रा अपचलन प्रकरणमा ट्रक चालक कुशाङ लामा र उक्त रकमका मालिक भनिएका नारायण पौडेलविरुद्ध काठमाडौं जिल्ला अदालतमा मुद्दा दायर गरेको छ।
गत चैत ४ गते काठमाडौंको टोखा–२ झोरस्थित सडकमा टोखाबाट झोरतर्फ जाँदै गरेको ना ७ ख १६५२ नम्बरको कन्टेनर ट्रकबाट काठमाडौं उपत्यका अपराध अनुसन्धान कार्यालय टेकुको टोलीले ठूलो मात्रामा विदेशी मुद्रा बरामद गरेको थियो। उक्त ट्रक कुशाङ लामाले चलाएका थिए।
विदेशी विनिमय ऐनअनुसार मुद्दा
विभागले विदेशी विनिमय ऐन, २०१९ को दफा ३, ४, ५, र ९ अनुसारको कसूरमा उनीहरूमाथि मुद्दा चलाएको हो। राष्ट्र बैंकको सोही दिनको विनिमय दरअनुसार बरामद रकमको मूल्य नेपाली रुपैयाँ २५ करोड ३४ लाख १८ हजार ८ सय ४२ कायम गरिएको छ।
मुद्दामा उनीहरूलाई ऐनको दफा १७ अनुसार जरिवाना र कैद सजाय माग गरिएको छ। साथसाथै, रकम लुकाउन प्रयोग गरिएको ट्रकलाई समेत ‘कसूरजन्य सम्पत्ति’ भन्दै जफत गर्न माग गरिएको छ।
चालक कुशाङ लामा पूर्व सजाय प्राप्त
चालक लामा यसअघि सुन चोरी–पैठारी मुद्दामा दोषी ठहर भई सजाय भुक्तान गरिसकेका थिए। पाँच वर्षभित्र पुनः यस्तै प्रकृतिको अपराध गरेको प्रमाणित भएको भन्दै, उनलाई मुलुकी अपराध संहिता २०७४ को दफा ४४२ अनुसार थप सजाय दिनुपर्ने माग गरिएको छ।
पैसाका धनी फरार
विदेशी मुद्राका वास्तविक धनी भनिएका नारायण पौडेल हालसम्म फरार छन्। भोटेकोशी गाउँपालिका–४, सिन्धुपाल्चोकका पौडेल यसअघि पनि रक्तचन्दन तस्करी, अवैध सुन कारोबार र हुन्डी व्यापारमा संलग्न भएको पाइएको छ। उनलाई पक्राउ गर्न अदालतबाट आवश्यक प्रक्रिया अगाडि बढाइएको छ।
